Mga mata ko'y kakaiba.
Nakikitang kulay ay iisa.
Iyong nakikita ang pisikal na itsura.
Aking dinarama ang pagkatao nila.
Mga salita ko'y pautal utal
Di maintindihan itong inuusal.
Salita mo'y malinaw pero lumalabas ay pinagbabawal
Saki'y di malinaw pero puno ng pagmamahal.
Mga tenga ko'y di normal, mundo ko'y puno ng katahimikan.
Ang sayo'y mahusay ngunit ibang salita'y di pinakikinggan.
Buka ng kanilang bibig aking lamang sinasabayan
Kaya't musika ng buhay aking napapakinggan.
Mga paa ko'y maigsi lang
Ang sayo'y buo ngunit paglakad kinatatamaran.
Hirap at sakit ang dulot ng bawat hakbang.
Tinitiis marating lang ang patutunguhan.
Mga kamay ko'y nawala nuong ako'y bata pa lamang
Bakit kumpleto mong kamay cellphone o ipad ang laging tangan?
Pagluluto ang ginawa kong libangan.
Paghawak sa bagay ginawan ko ng paraan.
Kami ay hindi perpekto.
May kulang man sa katawan o depekto
Pananaw sa buhay nanatiling positibo
Pangarap at pag-asa'y nagsusumamo
Kulang man sa paningin ninyo
Sarili'y ginagawa naming kumpleto.
No comments:
Post a Comment